കളങ്കാവലിൽ വില്ലനാണോ നായകനാണോ? ഉത്തരവുമായി വിനായകൻ

'മമ്മൂക്ക സിനിമയിലേക്ക് സജസ്റ്റ് ചെയ്തു, ഈ ജന്മത്തിലെ ഭാഗ്യം, അദ്ദേഹത്തിനൊപ്പം അഭിനയിക്കാൻ വളരെ ഈസിയാണ്'

ആരാധകരും പ്രേക്ഷകരും ഒരുപോലെ കാത്തിരിക്കുന്ന മമ്മൂട്ടി ചിത്രമാണ് കളങ്കാവൽ. സിനിമയിൽ മമ്മൂട്ടിയ്‌ക്കൊപ്പം അഭിനയിച്ചതിന്റെ അനുഭവം പങ്കിടുകയാണ് വിനായകൻ ഇപ്പോൾ. മമ്മൂട്ടിയ്‌ക്കൊപ്പം സിനിമയിൽ അഭിനയിക്കാൻ വളരെ എളുപ്പമാണെന്ന് പറയുകയാണ് വിനായകൻ. മമ്മൂട്ടി അഭിനയത്തിൽ തന്നെ ഒരുപാട് സഹായിച്ചിട്ടുണ്ടെന്നും വിനായകൻ കൂട്ടിച്ചേർത്തു. മമ്മൂട്ടി കമ്പനിയുടെ യൂട്യൂബ് ചാനലിലൂടെയാണ് വിനായകന്റെ അഭിമുഖം പുറത്ത് വന്നിരിക്കുന്നത്.

'രണ്ട് കഥാപാത്രമാണ്, പിന്നെ ഇത്രയും വലിയൊരു പടം മമ്മൂക്കയുടെ കൂടെ ചെയ്യാൻ പറ്റുന്നത് സിനിമയിലെ ഏറ്റവും വലിയ ഭാഗ്യമായി കാണുന്നു. എന്നെ അദ്ദേഹം ഈ സിനിമയിലേക്ക് സജസ്റ്റ് ചെയ്തത് വലിയ വാക്കാണ്, അതിന്റെ അപ്പുറത്തേക്ക് ഒന്നുമില്ല. മമ്മൂക്ക തന്നെ പറയുന്നു വിനായകനെ വെച്ച് ചെയ്യിക്കാം എന്ന്, ഈ ജന്മത്തിലെ ഭാഗ്യമാണ് അത്.

നായകനാണോ വില്ലനാണോ എന്ന് ചോദിച്ചാൽ രണ്ടും വ്യത്യസ്ത കഥാപത്രങ്ങളാണ്. രണ്ടു പേരുടെയും സ്വഭാവം ഒന്നാണ്. സാർ ചെയ്യുന്ന കഥാപാത്രത്തിന് അദ്ദേഹത്തിന്റെ സത്യങ്ങൾ ഉണ്ട്. എന്റെ കഥാപാത്രത്തിന് എന്റേതായ സത്യങ്ങൾ ഉണ്ട്. ഞാൻ ഒരു സിസ്റ്റത്തിന്റെ ആളാണ് മറ്റേത് ഒരു ഫ്രീഡത്തിന്റെയും.

മമ്മൂട്ടിയുമായി വർക്ക് ചെയ്യാൻ വളരെ എളുപ്പമാണ്. പുറത്ത് ആളുകൾ പറയുന്ന പോലെ അല്ല, അദ്ദേഹവുമായി ഒരു പടം ചെയ്യുന്നത് വളരെ ഈസി ആയിരുന്നു എനിക്ക്. സാർ സീനിയറാണ്, സൂപ്പർ സീനിയർ. ആക്റ്റിംഗിൽ ഞാൻ ഒരു ബോഡി ലാംഗ്വേജ് പിടിച്ചിട്ടുണ്ടായിരുന്നു സാർ വരുന്നതിന് മുൻപ്. ഡയലോഗിൽ സാർ വന്നതിന് ശേഷം എനിക്ക് ഒരുപാട് ഗുണം ഉണ്ടായി. അത്രയൊന്നും പറയണ്ടേ, അല്ലെങ്കിൽ ഇത്രയും പറഞ്ഞാൽ മതി എന്നൊക്കെ അദ്ദേഹം പറഞ്ഞു തന്നത് എനിക്ക് ഒരുപാട് ഗുണം ചെയ്തു,' വിനായകൻ പറഞ്ഞു.

കളങ്കാവൽ നേരത്തെ നവംബർ 27 നായിരുന്നു പുറത്തിറങ്ങാനിരുന്നത്. എന്നാൽ ചില കാരണങ്ങളാൽ സിനിമയുടെ റിലീസ് മാറ്റിവെച്ചിരുന്നു. ചിത്രം ഡിസംബർ അഞ്ചിന് പുറത്തിറങ്ങും. ഒരു നീണ്ട ഇടവേളയ്ക്ക് ശേഷം മമ്മൂട്ടിയുടേതായി തിയേറ്ററുകളിൽ എത്തുന്ന ഈ ചിത്രത്തിന് ഒരുപാട് പ്രതീക്ഷയാണ് ഉള്ളത്. ഒരു ഗംഭീര ക്രൈം ആക്ഷൻ ത്രില്ലർ ചിത്രമായിരിക്കും കളങ്കാവൽ എന്നാണ് ട്രെയ്‌ലർ നൽകിയ സൂചന. ജിഷ്ണു ശ്രീകുമാറും ജിതിൻ കെ ജോസും ചേർന്ന് തിരക്കഥ രചിച്ച കളങ്കാവൽ മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ഏഴാമത്തെ ചിത്രമാണ്.

Vinayakan talks about Mammootty in the movie Kalamkaval

To advertise here,contact us